Méizuel

D'Méizuel ofgekierzt pl, kann am Lëtzebuergeschen op en etlech Manéiere gebilt ginn. Et gëtt keng allgemeng Regel, sou datt een einfach muss wëssen, wéi d'Méizuel ass.

Déi heefegst Endunge sinn:

-en

d'Fra	pl = d'Fraen
d'Wonn	pl = d'Wonnen

-er

d'Bett	pl= d'Better
den Dësch	pl = d'Dëscher

Wierder déi aus dem Franséische kommen, kréien am allgemengen d'Endung -(e)n an der Méizuel:

de Client	pl = d'Clienten
de Wagon	pl = d'Wagonen
d'Ficelle	pl = d'Ficellen

Datselwecht gëllt fir Wierder déi aus anere Sprooche kommen:

den Toreador	pl = d'Toreadoren
d'Paprika	pl = d'Paprikaen
de Computer	pl = d'Computeren

Verschiddener changéieren de Vokal oder Duebellaut an der Méizuel:

den Numm	pl = d'Nimm
de Plou	pl = d'Pléi
de Schaf	pl = d'Schief

Aner Substantiver bleiwen onverännert:

d'Päerd	pl = d'Päerd
de Schong	pl = d'Schong
de Fréisser	pl = d'Fréisser

En etlech changéieren e Konsonant an/oder e Vokal, an/oder kréien eng Silb méi:

d'Blat	pl = d'Blieder
d'Haus	pl = d'Haiser
d'Maus	pl = d'Mais
d'Glas	pl = d'Glieser

Zu gudder Lescht gëtt et nach déi, déi en en an der Eenzuel hunn, an deen an der Méizuel verléieren:

den Deputéierten pl = d'Deputéiert.